Berjasulta eða Strike/Illuminate

Strike/Illuminate – NorthArc slagverkstríóið – Tónleikar sunnudaginn 18. mars 2012 kl: 20 í Hafnarhúsinu – Aðgangur ókeypis.

NorthArc slagverkstríóið er á debut tónleikaferðalagi um Skandinavíu um þessar mundir sem kallast Strike/Illuminate. Þau munu halda sex tónleika í fjórum löndum, Noregi, Danmörku, Svíþjóð og hefja ferðalagið á íslandi.

Á tónleikum Jaðarbers leika þau Dressur, meistaraverk Mauricios Kagel fyrir súrealískt tónlistarleikhús, auk þess sem þau munu frumflytja þrjú ný verk á tónleikunum þar sem tónsmíðarnar notast við ljós og lýsingu á einhvern hátt. Þau munu frumflytja splunkunýtt verk Önnu Þorvaldsdóttur, Aura, sem samið var fyrir tríóið og einnig ný verk eftir bandaríska tónskáldið Carolyn Chen og Antoniu Barnett-McIntosh frá Nýja Sjálandi.

Tríóið leggur áherslu á samtvinnun listgreina með því að leggja rækt við að panta ný verk og gera tilraunir með tónleikaformið. Meðlimir NorthArc eru búsettir í Noregi, en það eru þau Sindre Sætre, Vidar Thorbjørnsen og Jennifer Torrence.

Það er Jaðarberi sérstök ánægja að fá þessa gesti í heimsókn og óhætt að segja að slagverkstónleikar eru skemmtileg tíðindi á Íslandi. Sérlega skemmtilegt er að að geta boðið upp á þrjá frumflutninga með hópnum!

Meira á www.northarc.no

John Cage – Stórafmæli

Í ár eru liðin 100 ár frá fæðingu tónskáldsins John Cage, en nánar tiltekið fæddist John Milton Cage Jr. 5. september árið 1912. Alls kyns tónleikar og viðburðir til að heiðra minningu John Cage verða haldnir á árinu víðsvegar um heiminn. Jaðarberið vill gjarnan vera með í þessari bylgju því Íslandsvinurinn John Cage hefur haft mikil áhrif á listasögu hér eins og annars staðar. Cage var heimspekingur, ljóðskáld, myndlistarmaður og sveppatínslumaður. Hann var leiðandi í avant-garde stefnu eftirstríðsáranna og brautryðjandi í elektrónískri og tilviljunarkenndri tónlist. Sumir myndu jafnvel halda því fram að Cage sé einhver áhrifamesti listamaður 20. aldarinnar, en dæmi hver fyrir sig.

Á afmælistónleikunum sem haldnir verða miðvikudagskvöldið 15. febrúar munum við heyra glefsur frá mismunandi tímabilum í tónsmíðaferli John Cage, þó ekki sé hægt að tala um eiginlega sneiðmynd vegna fjölbreytileika og magns tónverka. Á tónleikunum má heyra verkin Aria, Fontana Mix, Six Melodies for Violin and Piano (Keyboard), Suite for Toy Piano, And the Earth Shall Bear Again og Prelude for Meditation. Lögð verður áhersla á tónskáldið Cage enda er meirihluti verka hans fyrst og fremst konsertmúsík þó mörgum finnist verk hans teygja mörkin í ýmsar áttir.
Flytjendur eru Heiða Árnadóttir, söngkona, Una Sveinbjarnardóttir, fiðluleikari, Tinna Þorsteinsdóttir, píanóleikari, Páll Ivan Pálsson, tónsmiður, Guðmundur Steinn Gunnarsson, tónsmiður og Jesper Pedersen, tónsmiður.

Miðvikudag 15. febrúar 2012 kl: 20:00 á Kjarvalsstöðum — Aðgangur ókeypis

Frosin ber

Frosin ber – Norrænir tónleikar miðvikudaginn 30. nóvember 2011 kl: 20 á Kjarvalsstöðum – Aðgangur ókeypis.

Á frosnum berjum beinir Jaðarber sjónum að norrænni tónlist sem vinnur með tilraunakennda framsetningu. Verkin snúast flest í kringum einhvers konar konsept eða ótónlistarlegar hugmyndir. Um er að ræða eins konar bylgju sem orðið hefur til á Norðurlöndum meðal tónskálda sem fædd eru á 8. áratug síðustu aldar. Mörg af þessum tónskáldum hafa vakið mikla athygli víða um heim og þá sérstaklega á tónlistarhátíðum á meginlandi Evrópu.

Í einu verka Simon Steen-Andersens (DK) fær selló rafmagn og whammy-pedal. Stine Sørlie (NO) leikur sér með frjálst form og tilviljanir. Kaj Aune (DK) er vídjó- og gjörningalistamaður og á tónleikunum verður síðan frumflutt splunkunýtt kammerverk eftir Øyvind Torvund (NO) sem samið var sérstaklega fyrir þetta tækifæri.

Flytjendur frosna berja eru:
Una Sveinbjarnardóttir, fiðla
Guðni Franzson, klarinett
Hrafnkell Orri Egilsson, selló
Tinna Þorsteinsdóttir, píanó
Frank Aarnink, slagverk
Páll Ivan Pálsson, slagverk

John Cage og Pauline Oliveros

Tónlistarhópurinn Fengjastrútur flytur verk eftir Pauline Oliveros og Tinna Þorsteinsdóttir flytur verk fyrir undirbúið píanó eftir John Cage í tengslum við myndlistarsýninguna Ný list verður til á Listasafni Reykjavíkur og Jaðarber. Dagný Kristjánsdóttir, prófessor í íslenskum nútímabókmenntum við Háskóla Íslands, verður í gestaspjalli hjá sýningarstjóranum Jóni Proppé kl: 15 og verða verkin flutt fyrir og eftir spjall. Sunnudaginn 30. október á Kjarvalsstöðum.
Nánar um viðburðinn

Tilraunamennska sjöunda áratugarins

Tónleikar á sýningunni Ný list verður til á Kjarvalsstöðum miðvikudaginn 26. október kl: 20 – Aðgangur ókeypis.

Flytjendur eru Jaðarbershópurinn, en að þessu sinni skipa hann Freyja Gunnlaugsdóttir, klarinett, Sigurgeir Agnarsson, selló, Tinna Þorsteinsdóttir, píanó, Guðmundur Steinn Gunnarsson, tónsmiður ásamt Heiðu Árnadóttur, söngkonu, Páli Ivan Pálssyni, tónsmið og Jesper Pedersen, tónsmið

Efnisskrá:
Magnús Blöndal Jóhannsson: Frostrósir (1970) mynd- og hljóðverk með ballett eftir Ingibjörgu Björnsdóttur
Þorkell Sigurbjörnsson: Fípur (1971) rafverk
Atli Heimir Sveinsson: Mengi (1966) fyrir píanó
Nam June Paik: Dragging Suite (ártal ekki vitað)
Leifur Þórarinsson: Piece (1966) fyrir klarinett, selló og píanó
Yoko Ono: Lighting Piece (1955) og Toilet Piece (1971)
Dieter Roth: Der Akkorden Fluch (1981-82)
Þorsteinn Hauksson: Humma? (1972) fyrir tvo sóprana og bassa

Flúxus-gjörningar 2

Tveir Flúxus-gjörningar verða fluttir af tónlistarhópnum Fengjastrúti: Píanókonsert nr. 2 fyrir Paik eftir Ben Vautier og Distance for Piano (To David Tudor) eftir Takehisa Kosugi (báðir frá árinu 1965) í tengslum við myndlistarsýninguna Ný list verður til á Listasafni Reykjavíkur og Jaðarber. Bjarki Sveinbjörnsson, forstöðumaður Tónlistarsafns Íslands, ræðir um tilraunir í tónlist á sjöunda áratugnum kl: 15 og verða gjörningarnir fluttir fyrir og eftir spjall. Sunnudaginn 9. október á Kjarvalsstöðum.
Nánar um viðburðinn

Sláturtíð á Jaðarberi

Sláturtíð 2011 mun fara fram dagana 28. september til 3. október. Tónlistarhátíðin Sláturtíð (tónskáldahópsins S.L.Á.T.U.R.) verður þá haldin í þriðja sinn. Alls eru 7 atburðir á hátíðinni, allflestir í samstarfi við Listasafn Reykjavíkur og tónleikaseríuna Jaðarber sem er hýst í Hafnarhúsinu. Erlendir gestir mun gera vart við sig á hátíðinni, bæði Vortex Project frá Austurríki/Slóveníu og síðan Christoph Schiller Frá Sviss. Þar að auki mun heyrast mikið af glænýjum ágengum verkum í höndum íslenskra flytjenda. Má þar nefna Fagverk, Fengjastrút og nokkur nýsmíðuð vélmenni sem munu leika á sjálf sig, flugvélahluta og búsáhöld.